By Our Correspondent
BHUBANESWAR/NEW DELHI: ଲୌହମାନବ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ନିର୍ଣ୍ଣୟ ନେବାର କ୍ଷମତା ଓ ଦୃଢ ଇଚ୍ଛାଶକ୍ତି ସମସ୍ତଙ୍କୁ ପ୍ରଭାବିତ କରିବା ସହ ନିରନ୍ତର ପ୍ରେରଣା ଦେଉଛି । ଦେଶର କଲ୍ୟାଣ ପାଇଁ ବଡ଼ ଲକ୍ଷ୍ୟକୁ ପୂରଣ କରିବା ଦିଗରେ ପଟେଲଙ୍କ କର୍ତ୍ତବ୍ୟ ଓ ନେତୃତ୍ୱ ଜ୍ୱଳନ୍ତ ଉଦାହରଣ ବୋଲି କହିଛନ୍ତି କେନ୍ଦ୍ର ଶିକ୍ଷା ଓ ଦକ୍ଷତା ବିକାଶ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ସର୍ଦ୍ଦାର ପଟେଲଙ୍କ ଜୟନ୍ତୀ ଅବସରରେ ସଂସଦରେ ଆୟୋଜିତ ‘ରାଷ୍ଟ୍ରୀୟ ଏକତା ଦିବସ’ କାର୍ଯ୍ୟକ୍ରମ ଓ ଦିଲ୍ଲୀ ବିଶ୍ୱବିଦ୍ୟାଳୟରେ ‘ଏକତା ପାଇଁ ଦୌଡ’ର ଶୁଭାରମ୍ଭ କରିବା ଅବସରରେ ଶ୍ରୀ ପ୍ରଧାନ ଏହା କହିଛନ୍ତି । କେନ୍ଦ୍ରମନ୍ତ୍ରୀ ସଂସଦର ସେଣ୍ଟରାଲ ହଲରେ ଆୟୋଜିତ କାର୍ଯ୍ୟକ୍ରମରେ ଲୋକସଭା ବାଚସ୍ପତି ଓମ ବିର୍ଲାଙ୍କ ସହ ଯୋଗ ଦେଇଥିଲେ । ଏହି କାର୍ଯ୍ୟକ୍ରମରେ ଦେଶର କୋଣ ଅନୁକୋଣରୁ ଆସିଥିବା ଯୁବଶକ୍ତିଙ୍କୁ ସମ୍ବୋଧିତ କରି ସେ କହିଛନ୍ତି, ନିକଟରେ ସ୍ୱାଧୀନତା ଦିବସ ଅବସରରେ ପ୍ରଧାନମନ୍ତ୍ରୀ ମୋଦି ଲାଲକିଲ୍ଲାରୁ ଦେଶବାସୀଙ୍କୁ ସମ୍ବନ୍ଧିତ କରି ବଡ ସଂକଳ୍ପ, ବଡ ସ୍ୱପ୍ନ ଉପରେ କାମ କରିବା ପାଇଁ ଆଗ୍ରହ କରିଛନ୍ତି । ଆମକୁ କେବଳ ଭାରତ ନୁହେଁ ବରଂ ବିଶ୍ୱ କଲ୍ୟାଣ ପାଇଁ କାର୍ଯ୍ୟ କରିବାକୁ ହେବ । ଆଜିର ଯୁବପିଢି କେବଳ ଭାରତ ନୁହଁ ବରଂ ବିଶ୍ୱର ନେତୃତ୍ୱ ନେବ ।
ଯେଉଁ ଲୋକମାନେ ଆମକୁ ୨୫୦ ବର୍ଷ ପର୍ଯ୍ୟନ୍ତ ଶାସନ କଲେ, ଆଜି ସେମାନେ ଆମ ଠାରୁ ବହୁତ ପଛରେ ଅଛନ୍ତି । ଅମୃତ ମହୋତ୍ସବର ଏହି କାଳଖଣ୍ଡରେ ଭାରତ ବିଶ୍ୱର ପଞ୍ଚମ ବୃହତ୍ତମ ଅର୍ଥନୀତି ରୂପରେ ଉଭା ହୋଇଛି । ଆଜି ଦେଶର ଯୁବଶକ୍ତିକୁ ବୈଶିକ କଲ୍ୟାଣର ଏକ ନୂଆ ରଚନା କରିବାର ସୌଭାଗ୍ୟ ପ୍ରାପ୍ତ ହୋଇଛି । ପ୍ରଧାନମନ୍ତ୍ରୀଙ୍କ ଆହ୍ୱାନ କ୍ରମେ ଆସନ୍ତା ୨୫ ବର୍ଷରେ ଆମେ ଆମର କର୍ତ୍ତବ୍ୟକୁ ପାଳନ କରିବା ସହ ଆମକୁ ଭାରତକୁ ଶ୍ରେଷ୍ଠ ଏବଂ ଅଧିକ ମଜଭୂତ୍ ବନାଇବାକୁ ହେବ । ଏକ ଭାରତ ଶ୍ରେଷ୍ଠ ଭାରତର ସ୍ୱପ୍ନ ସର୍ଦ୍ଦାର ପଟେଲ ହିଁ ଦେଖିଥିଲେ । ଏକବିଂଶ ଶତାବ୍ଦୀର ଭାରତକୁ ନେଇ ଆମେ ଗର୍ବିତ ଓ ଏହାକୁ ଗଢିବାରେ ସର୍ଦ୍ଦାର ପଟେଲଙ୍କ ସବୁଠୁ ବଡ ଯୋଗଦାନ ରହିଛି । ଦେଶ ଯେତେବେଳେ ଅମୃତ ମହୋତ୍ସବ ପାଳନ କରୁଛି ସେ ସମୟରେ ପ୍ରଧାନମନ୍ତ୍ରୀ ମୋଦିଙ୍କ କଳ୍ପନା ଓ ଲୋକସଭା ବାଚସ୍ପତି ଓମ ବିର୍ଲାଙ୍କ ମାର୍ଗଦର୍ଶନରେ ଲୋକତନ୍ତ୍ରର ଏହି ମନ୍ଦିରରେ ରାଷ୍ଟ୍ର ନାୟକଙ୍କୁ ସ୍ମରଣ କରିବାର ଏକ ନୂଆ ପରମ୍ପରା ଆରମ୍ଭ କରାଯାଇଛି ।
ସେହିପରି ଜାତୀୟ ଏକତା ଦିବସରେ ଦିଲ୍ଲୀ ବିଶ୍ୱବିଦ୍ୟାଳୟରେ ‘ଏକତା ପାଇଁ ଦୌଡ’ର ଶୁଭାରମ୍ଭ କରିବା ଅବସରରେ କେନ୍ଦ୍ରମନ୍ତ୍ରୀ କହିଛନ୍ତି ଯେ ସ୍ୱାଧୀନତା ପରେ ଦେଶକୁ ଏକାଠୀ କରିବା ଏବଂ ଆଜିର ଭାରତକୁ ଏକ୍ କରିବାରେ ପଟେଲଙ୍କ ରାଜନୈତିକ ଇଚ୍ଛାଶକ୍ତି ଓ ନେତୃତ୍ୱ କ୍ଷମତାର ଅତୁଳନୀୟ ଯୋଗଦାନ ରହିଛି । ପଟେଲଙ୍କ ଯୋଗଦାନ କେବଳ ଭାରତକୁ ସ୍ୱାଧୀନତା ଦେବାରେ ସୀମିତ ନଥିଲା ବରଂ ଏକ ଶକ୍ତିଶାଳୀ ରାଷ୍ଟ୍ର ଗଠନରେ ସେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ । ଅମୃତ ମହୋତ୍ସବର ସମୟ ଓ ରାଷ୍ଟ୍ରୀୟ ଏକତା ଦିବସର ଅବସରରେ ସର୍ଦ୍ଦାର ପଟେଲଙ୍କ ଭୂମିକା, ତାଙ୍କ ନେତୃତ୍ୱ ଏବଂ ଇଚ୍ଛାଶକ୍ତି ଓ ତାଙ୍କ ଉପରେ ହେଉଥିବା ଚର୍ଚ୍ଚାକୁ ଆଗକୁ ବଢାଇବା ପାଇଁ ଦିଲ୍ଲୀ ବିଶ୍ୱବିଦ୍ୟାଳୟକୁ ଶ୍ରୀ ପ୍ରଧାନ ପରାମର୍ଶ ଦେଇଛନ୍ତି । ଏହା ଦ୍ୱାରା ଆଗାମୀ ପିଢିମାନେ ରାଷ୍ଟ୍ରର ଏକତା, ଅଖଣ୍ଡତା ଓ ପ୍ରଗତିରେ ତାଙ୍କର ଯୋଗଦାନକୁ ଜାଣିପାରିବେ ଓ ପଟେଲଙ୍କ ଭଳି ମହାନୁଭବଙ୍କ ଜୀବନ ଏବଂ ରାଷ୍ଟ୍ର କଲ୍ୟାଣର ସଂକଳ୍ପ ଦ୍ୱାରା ପ୍ରେରିତ ହେବେ ।
ଦିଲ୍ଲୀ ବିଶ୍ୱବିଦ୍ୟାଳୟରେ ଆୟୋଜିତ ଏକତା ପାଇଁ ଦୌଡରେ ଦିଲ୍ଲୀ ବିଶ୍ୱବିଦ୍ୟାଳୟର କୁଳପତି ପ୍ରଫେସର ଯୋଗେଶ ସିଂହଙ୍କ ସହ କୁଳସଚିବ, ଅଧ୍ୟକ୍ଷ, ଶିକ୍ଷକ ଶିକ୍ଷୟିତ୍ରୀ, ବରିଷ୍ଠ ଅଧିକାରୀ, ପ୍ରଶାସନିକ କର୍ମଚାରୀ, କେନ୍ଦ୍ରୀୟ ବିଦ୍ୟାଳୟ, ସିବିଏସଏଇ ସ୍କୁଲ ଓ ବିଶ୍ୱବିଦ୍ୟାଳୟ ଛାତ୍ରଛାତ୍ରୀ ଭାଗ ନେଇଥିଲେ । ଏହି ଅବସରରେ ଶ୍ରୀ ପ୍ରଧାନ ନୂଆଦିଲ୍ଲୀ ସ୍ଥିତ ବଲ୍ଲଭ ଭାଇ ପଟେଲ ଚେଷ୍ଟ ଇନଷ୍ଟିଚ୍ୟଟ ପରିସରରେ ପଟେଲଙ୍କ ପ୍ରତିମୂର୍ତ୍ତିରେ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ ।
