By Our Correspondent
BHUBANESWAR: ଓଡ଼ିଶାର ପୂର୍ବତନ ରାଜ୍ୟପାଳ ଏମ୍. ଏମ୍. ରାଜେନ୍ଦ୍ରନଙ୍କର ଶନିବାର ଚେନ୍ନାଇ ଠାରେ ପରଲୋକ ହୋଇଯାଇଛି । ଶନିବାର ଦିନ ୧୨.୩୦ ସମୟରେ ତାଙ୍କର ପରଲୋକ ହୋଇଛି ।
୧୯୯୯ ମସିହାର ଅଭୁତପୂର୍ବ ମହାବାତ୍ୟାର ପରେ ପରେ ଶ୍ରୀଯୁକ୍ତ ରାଜେନ୍ଦ୍ରନ୍ ଓଡିଶାର ରାଜ୍ୟପାଳ ଭାବରେ କାର୍ଯ୍ୟଭାର ସମ୍ଭାଳିଥିଲେ । ରାଜ୍ୟ ସରକାରଙ୍କୁ ବିଶେଷ ଭାବେ ରିଲିଫ୍ ଓ ପୁନର୍ବାସ କାର୍ଯ୍ୟରେ ସହାୟତା କରି ସେ ପ୍ରଶଂସିତ ହୋଇଥିଲେ।
ଇଂରାଜୀରେ ରଚିତ ତାଙ୍କ ଆତ୍ମଜୀବନୀ ‘Service Uninterrupted’କୁ ଓଡିଆ ଭାଷାରେ ଦେଖିବାର ତାଙ୍କର ଅଭୀପ୍ସା ସତେ ଯେଭଳି ତାଙ୍କୁ ବଂଚାଇ ରଖିଥିଲା । ଶିକ୍ଷା ଓ ଅନୁସନ୍ଧାନ ବିଶ୍ୱବିଦ୍ୟାଳୟ ପକ୍ଷରୁ ତାଙ୍କର ଆତ୍ମଜୀବନୀ ଓଡ଼ିଆରେ ଅନୁବାଦ ଓ ପ୍ରକାଶନ କରାଯାଇଥିଲା । ଓଡ଼ିଆରେ ଅନୁବାଦିତ ତାଙ୍କର ଆତ୍ମଜୀବନୀ “ସେବା ଅବ୍ୟାହତ” କୁ ସୋଆର ପ୍ରଫେସର ନଚିକେତା ଖମାରୀ ଶର୍ମା ଅନୁବାଦ କରିଥିଲେ । ଏହି ପୁସ୍ତକକୁ ଗତ ଜୁଲାଇ ୨୦ ତାରିଖରେ ବିଶ୍ୱବିଦ୍ୟାଳୟ ପରିସରରେ ଉନ୍ମୋଚନ କରାଯାଇଥିବାବେଳେ ଅଗଷ୍ଟ ୨୦ ତାରିଖରେ ସେ ଭାରତର ରାଷ୍ଟ୍ରପତି ଙ୍କୁ ଔପଚାରିକ ଭାବେ ଭେଟି ଦେଇଥିଲେ ।
ଆଧୁନିକ ଆନ୍ଧ୍ରପ୍ରଦେଶର ଅନନ୍ତପୁର ଠାରେ ୧୨ ଏପ୍ରିଲ ୧୯୩୫ ରେ ସେ ଜନ୍ମଗ୍ରହଣ କରିଥିଲେ । ୧୯୫୭ ମସିହାରେ ଆଇଏଏସ ଟପ୍ପର ହୋଇ ଭାରତୀୟ ପ୍ରଶାସନିକ ସେବାରେ ଯୋଗ ଦେଇଥିବା ବେଳେ ଚାକିରୀରୁ ଅବସର ନେବା ପରେ ଓଡିଶାର ରାଜ୍ୟପାଳ ଭାବରେ ୫ ବର୍ଷର କାର୍ଯ୍ୟକାଳ ଭିତରେ ତିନିଜଣ ମୁଖ୍ୟମନ୍ତ୍ରୀ ଶ୍ରୀ ଗିରିଧାରୀ ଗମାଙ୍ଗୋ, ସ୍ୱର୍ଗତ ହେମାନନ୍ଦ ବିଶ୍ୱାଳ ଓ ଶ୍ରୀ ନବୀନ ପଟ୍ଟନାୟକ ସହିତ ସେ କାର୍ଯ୍ୟ କରିଥିଲେ ।
“ମାନବ ସେବାରେ ଆଦର୍ଶ ଅବଦାନ” ମାନ୍ୟତା ପାଇଁ ରୋଟାରୀ ଇଟଂରନ୍ୟାସନାଲ ତାଙ୍କୁ ସମ୍ମାନଜନକ ଜୀବନବ୍ୟାପୀ ସଦସ୍ୟତା ପ୍ରଦାନ କରିଥିଲେ । ସେ ଛାଡି ଯାଇଛନ୍ତି ତାଙ୍କର ୬୪ ବର୍ଷର ଜୀବନସାଥୀ ସୁଶୀଳା ରାଜେନ୍ଦ୍ରନ, ଝିଅ ସୁମାଙ୍କ ସହିତ ସାତଜଣ ନାତିନାତୁଣୀଙ୍କୁ ।
