By Our Correspondent
BHUBANESWAR: ମାତୃଭାଷାରେ କଥା କହୁଥିବା ଓ ଚିନ୍ତା କରିଥିବା ପିଲା ମାନଙ୍କୁ ପରବର୍ତ୍ତୀ ପର୍ଯ୍ୟାୟରେ ଭିନ୍ନ ଭାଷାରେ ଶିଖାଗଲେ ସେମାନଙ୍କ ମନରେ ଦ୍ୱନ୍ଦ ଜାତ ହୋଇଥାଏ ବୋଲି ଗୁରୁବାର ଭୁବନେଶ୍ୱର ଠାରେ ବର୍ଣ୍ଣମାଳା ଆଧାରିତ ‘କୁଓ୍ୱି’ ଓ ‘ଦେଶୀଆ’ ଭାଷା ପୁସ୍ତକ ସହ ଏକ ସ୍ୱତନ୍ତ୍ର ପୋଷ୍ଟାଲ କଭରର ଉନ୍ମୋଚନ କରିବା ଅବସରରେ କେନ୍ଦ୍ର ଅର୍ଥ ମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ।
ସେ କହିଛନ୍ତି ଯେ ଯେତେବେଳେ ଜଣେ ନିଜ ମାତୃଭାଷାରେ ଶିଖେ, କଥା ହୁଏ ଓ ଚିନ୍ତା କରେ, ସେତେବେଳେ ସେ ପରବର୍ତ୍ତୀ ପର୍ଯ୍ୟାୟରେ ମଧ୍ୟ ସେହି ଭାଷାକୁ ବ୍ୟବହାର କରିବା ନେଇ ସ୍ପଷ୍ଟ ମତ ରଖେ । ମାତ୍ର ଯଦି ପିଲାଙ୍କୁ ପଢ଼ିବା କିମ୍ବା କହିବା ଠାରୁ ଭିନ୍ନ ଭାଷା ଶିଖାଯାଏ ତେବେ ସେମାନେ ଦ୍ୱନ୍ଦରେ ପଡନ୍ତି । ଏହାର ବୈଜ୍ଞାନିକ ପ୍ରମାଣ ମଧ୍ୟ ରହିଛି । ସେଥିପାଇଁ ମାତୃଭାଷାରେ ଶିକ୍ଷା ଦାନ ଜରୁରୀ ଅଟେ । ସେ ଆହୁରି କହିଛନ୍ତି ଯେ ଜନଜାତି ପିଲାଙ୍କୁ ସାହାଯ୍ୟ କରିବା ଦିଗରେ ଶିକ୍ଷା ମନ୍ତ୍ରଣାଳୟ ପକ୍ଷରୁ ଆଞ୍ଚଳିକ ଭାଷାରେ ପାଠ୍ୟ ପୁସ୍ତକ ପ୍ରୟାସ କରାଯାଉଛି । ସ୍ଥାନୀୟ ଭାଷା ଏବଂ ଉପଭାଷାରେ ପାଠ୍ୟ ପୁସ୍ତକ ପ୍ରସ୍ତୁତି ଦ୍ୱାରା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଏକ ଭାରତ, ଶ୍ରେଷ୍ଠ ଭାରତ କଳ୍ପନା ସମୃଦ୍ଧ ହେବ ।
ସେହିପରି କେନ୍ଦ୍ର ଶିକ୍ଷା, ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି କାର୍ଯ୍ୟକ୍ରମରେ ଯୋଗ ଦେଇ କହିଛନ୍ତି ଯେ ଦେଶର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ କରକମଳରେ ଉନ୍ମୋଚିତ ବର୍ଣ୍ଣମାଳା ଆଧାରିତ ‘କୁଓ୍ୱି’ ଓ ‘ଦେଶୀଆ’ ଭାଷା ପୁସ୍ତକ ୧୦୦ରୁ କମ ଦିନ ମଧ୍ୟରେ ପ୍ରସ୍ତୁତ ହେଇଛି । ଏହି ପୁସ୍ତକ ଜନଜାତି ପିଲାଙ୍କ ମଧ୍ୟରେ ଭାଷା ପାର୍ଥକ୍ୟକୁ ଦୂର କରିବ । ଶ୍ରୀ ପ୍ରଧାନ କହିଛନ୍ତି ଯେ ଗତ ଉତ୍କଳ ଦିବସ ଅବସରରେ କୋରାପୁଟ ଜିଲ୍ଲାର କୋଟିଆ ଅଂଚଳ ଗସ୍ତ କଲାବେଳେ ସେ ପିଲାମାନଙ୍କ ସହ କଥା ହୋଇଥିଲେ । ମାତ୍ର ସେଠାରେ ସେ କନ୍ଧ ସମୁଦାୟରେ ଛାତ୍ରଛାତ୍ରୀମାନେ ଶ୍ରେଣୀଗୃହରେ ଓଡ଼ିଆରେ କଥା ହୋଇପାରୁ ନଥିଲେ ଏବଂ ଶିକ୍ଷକମାନେ ସମସ୍ତେ ଓଡ଼ିଆ ହୋଇଥିବାରୁ ପିଲାଙ୍କ ଭାଷା ବୁଝିପାରୁ ନଥିବାର ଲକ୍ଷ୍ୟ କରିଥିଲେ । ଏଥିପାଇଁ ସେ ଜନଜାତି ପିଲା ମାନଙ୍କ ପାଇଁ ‘କୁଓ୍ୱି’ ଓ ‘ଦେଶୀଆ’ ଭାଷାରେ ଛବିଳ ମଧୁ ବର୍ଣ୍ଣବୋଧ ପରି ପୁସ୍ତକ କରିବା ପାଇଁ କୋରାପୁଟ ସ୍ଥିତ କେନ୍ଦ୍ରୀୟ ବିଶ୍ୱବିଦ୍ୟାଳୟର ସହଯୋଗରେ ଏନସିଇଆରଟିକୁ ପରାମର୍ଶ ଦେଇଥିଲେ ବୋଲି ଶ୍ରୀ ପ୍ରଧାନ କହିଛନ୍ତି ।
କେନ୍ଦ୍ରମନ୍ତ୍ରୀ କହିଛନ୍ତି ଯେ ଛବିଳ ମଧୁ ବର୍ଣ୍ଣବୋଧ ସ୍ୱରୂପ ଦୁଇଟି ଜନଜାତି ଭାଷାଭାଷୀ ପୁସ୍ତକ ଦ୍ୱାରା ଅବିଭକ୍ତ କୋରାପୁଟ ଜିଲ୍ଲାର ଜନଜାତି ସମ୍ପ୍ରଦାୟର ପିଲାମାନେ ‘କୁଓ୍ୱି’ ଓ ‘ଦେଶିଆ’ ଭାଷାର ଧ୍ୱନି, ବର୍ଣ୍ଣ, ଶବ୍ଦ ବ୍ୟବହାର ସହିତ ଓଡ଼ିଆ ଭାଷାର ବର୍ଣ୍ଣ ପ୍ରକରଣ ଶିଖିପାରିବେ । କଥନ ସହିତ ପଠନ ଓ ଲିଖନରେ ମଧ୍ୟ ଦକ୍ଷତା ଅର୍ଜନ କରିପାରିବେ । ଏଥିପାଇଁ ଶ୍ରୀ ପ୍ରଧାନ ପୁସ୍ତକ ଦୁଇଟିର ପ୍ରସ୍ତୁତି କାର୍ଯ୍ୟରେ ନିଜର ବହୁମୂଲ୍ୟ ଶ୍ରମ ଓ ସମୟ ବିନିଯୋଗ କରିଥିବା କମିଟି ସଦସ୍ୟ, ବିଶେଷଜ୍ଞ ଓ ଭାଷା-ଶିକ୍ଷକମାନଙ୍କୁ ଅଶେଷ ଧନ୍ୟବାଦ ଜଣାଇଛନ୍ତି ।
କିଛି ମାସ ପୂର୍ବରୁ ‘ଜାତୀୟ ଶିକ୍ଷା ଦିବସ’ ଅବସରରେ ମାନ୍ୟବର ରାଷ୍ଟ୍ରପତିଙ୍କ ଦ୍ୱାରା ଓଡ଼ିଆ ଇଞ୍ଜିନିୟରିଂ ପୁସ୍ତକ ଉନ୍ମୋଚିତ ହୋଇଥିବା ବେଳେ ଆଜି ଅର୍ଥମନ୍ତ୍ରୀଙ୍କ ଦ୍ୱାରା ଏହି ଦୁଇ ପୁସ୍ତକର ଉନ୍ମୋଚନ ହେବା ଓଡ଼ିଶା ବିଶେଷ ଭାବରେ ଜନଜାତି ସମାଜ ପାଇଁ ଗର୍ବର ବିଷୟ । ପ୍ରଧାନମନ୍ତ୍ରୀଙ୍କ ଦୂରଦୃଷ୍ଟିପୂର୍ଣ୍ଣ ଜାତୀୟ ଶିକ୍ଷା ନୀତିରେ ମାତୃଭାଷାକୁ ସର୍ବଦା ପ୍ରାଥମିକତା ଦିଆଯାଉଛି । ମାତୃଭାଷାରେ ପାଠ ପଢିଲେ ହିଁ ପିଲାଙ୍କର ମାନସିକ ବିକାଶ, କ୍ରିଟିକାଲ ଥିଙ୍କିଂ ତଥା ଅନୁସନ୍ଧାନ କରିବାର କ୍ଷମତା ବୃଦ୍ଧି ହୋଇଥାଏ । ଆଗାମୀ ଦିନରେ ସବୁ ଭାରତୀୟ ଭାଷାରେ ପାଠପଢା ହେବ । ଶିକ୍ଷା ବ୍ୟବସ୍ଥାକୁ ମାତୃଭାଷା ଆଧାରିତ କରିବା ପାଇଁ ଭାରତ ସରକାର କଟିବଦ୍ଧ । ଆଜିର କାର୍ଯ୍ୟକ୍ରମ ମଧ୍ୟ ମୋଦି ସରକାରର କାର୍ଯ୍ୟଶୈଳୀର ପ୍ରତିଫଳନ ।
କୋରାପୁଟ ସ୍ଥିତ କେନ୍ଦ୍ରୀୟ ବିଶ୍ୱବିଦ୍ୟାଳୟଏବଂ ଏନସିଇଆରଟି ମିଳିତ ଭାବରେ ଅବିଭକ୍ତ କୋରାପୁଟ ଜିଲ୍ଲାରେ ଥିବା ସ୍କୁଲ ବିଶେଷ ଭାବରେ ଜନଜାତି ପିଲାମାନେ ପଢୁଥିବା ବିଦ୍ୟାଳୟରେ ଥିବା ଶିକ୍ଷକଙ୍କ ପାଇଁ ଏକ ଓରିଏନଟେସନ କାର୍ଯ୍ୟକ୍ରମ କରନ୍ତୁ । ‘କୁଓ୍ୱି’ ଓ ‘ଦେଶୀଆ’ ଭାଷା ପୁସ୍ତକ ଭଳି ଅନ୍ୟାନ୍ୟ ଜନଜାତି ଭାଷାରେ ବର୍ଣ୍ଣମାଳା ପୁସ୍ତକ ପ୍ରକାଶ କରିବା ପାଇଁ ଏସସିଇଆରଟି ଓ ଏନସିଇଆରଟି ମିଶି ପ୍ରଚେଷ୍ଟା କରିବା ଆବଶ୍ୟକ ବୋଲି ଶ୍ରୀ ପ୍ରଧାନ କହିଛନ୍ତି ।
